បន្ទាយមានជ័យ៖ អគ្គមេបញ្ជាការនៃកងយោធពលខេមរភូមិន្ទ នាយឧត្តមសេនីយ៍ វង្ស ពិសេន បានរម្លឹកពីតម្លៃនៃសន្ដិភាពដែលមកនូវការអភិវឌ្ឍន៍ និងរីកចម្រើននៅកម្ពុជា និងប្រាប់ឱ្យកងទ័ពត្រូវមានស្មារតីចង់ចាំនិងយល់ពាក្យនេះឱ្យបានច្បាស់ដើម្បីចេះថែរក្សានិងការពារកុំឱ្យបាត់បង់។
លោកបានលើកឡើងដូច្នេះក្នុងពេល ចុះសួរសុខទុក្ខកងទ័ព ទិសទី១ យោធភូមិភាគទី៥ ដែលធ្វើឡើងនៅទីបញ្ជាការតំបន់ប្រតិបត្តិការសឹករងបន្ទាយមានជ័យ កាលពីថ្ងៃទី៣ ខែមេសា ឆ្នាំ២០២២ ដោយថានយោបាយឈ្នះ-ឈ្នះ ដែលដាក់ចេញដោយសម្តេចតេជោ ហ៊ុន សែន គឺជា «មរតកមហាសាល នាំមកនូវសន្តិភាព និងការអភិវឌ្ឍ»។
នាយឧត្តមសេនីយ៍អគ្គមេបញ្ជាការទ័ព បានថ្លែងការកោតសរសើរ និងវាយតម្លៃខ្ពស់ ចំពោះសមិទ្ធផលជាច្រើនដែលនាយទាហាន នាយទាហានរង និងពលទាហាន ទិសទី១ យោធភូមិភាគទី៥ សម្រេចបាន ទាំងក្នុងការបំពេញភារកិច្ចការពារបូរណភាពទឹកដី ការពារសុខសន្តិភាព ស្ថិរភាព និងការកសាងអង្គភាព ពិសេសយុទ្ធនាការចាក់វ៉ាក់សាំងជូនប្រជាពលរដ្ឋ ការងារទប់ស្កាត់ជំងឺកូវីដ-១៩ ទទួលបានលទ្ធផលខ្ពស់ ។
លោកបានផ្តាំផ្ញើដល់នាយត្រូវចងចាំ និងយល់ពាក្យថា «អរគុណសន្តិភាព! អរគុណនយោបាយ ឈ្នះ ឈ្នះ ដឹងគុណស្ថាបនិក មគ្គុទ្ទេសក៏ឯក និងប្រតិបត្តិករនយោបាយឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ!» ដោយថា សន្តិភាព មានតម្លៃមិនសាបសូន្យ មិនថាថ្ងៃនេះ ឬថ្ងៃក្រោយនោះឡើយ។ ដូច្នេះត្រូវការពារឲ្យបាន ទោះក្នុងតម្លៃណាក៏ដោយ៕
